“Siti” qisqa fursatda 61 ta gol urgan hujumchini ketkazyapti

“Manchester Siti” akademiyasining 19 yoshli iqtidorli markaziy hujumchisi Metti Uorxerst klub tizimidagi muvaffaqiyatli faoliyatini yakunlash arafasida turibdi.

Hozirga kelib Chempionshipdan tortib, ikkinchi ligagacha boʻlgan jami beshta klub iqtidorli futbolchi boʻyicha soʻrov yuborgan.

Klubning sport direktori Ugu Viana ehtimoliy transfer shartnomasiga futbolchining kelajakdagi sotuvidan foiz olish bandini kiritishni rejalashtirmoqda.

2026/27 yilgi mavsum futbolchining rivojlanishida muhim oʻtish bosqichi hisoblanadi. Endi Metti yoshlar futbolida emas, professional darajada oʻzini koʻrsatishi shart.

Asosiy jamoada Erling Xolandning natijalari hamon akademiyadan chiqayotgan markaziy hujumchilar uchun toʻsiq boʻlib qolmoqda. Bu toʻsiqni anglagan holda, Uorxerst vakillari klub rahbariyati bilan uning ketish rejasini muhokama qilgan.

Mail Sport jurnalisti Saymon Jonsning xabar berishicha, “Manchester Siti” akademiyasining yuqori baholanayotgan hujumchisi Metti Uorxerst yozda baribir klubni tark etishga tayyor. U akademiya tizimida 97 oʻyinda 61 ta gol urgan.

19 yoshli futbolchiga “Stokport Kaunti”, “Suindon Taun”, “Kembridj Yunayted”, “Nortgempton Taun” va “Berton Albion” klublaridan taklif bor.